ДОБРА ИДЕЈА
Загрепчанецот Марко Новосел добил отказ, па по кратко мозгање му текнало како да заработува за живот. Дал оглас во весник каде напишал: “Маж на заем“ - поправам штекери, ролетни, бела техника, шетам миленичиња, помагам при преселување, инсталирам компјутери, односно правам се што е поврзано со вашиот дом.
За само два месеци Марко морал да вработи соработник бидејќи сам не можел да постигне.  

ДОМОРОДНИ ОБЛАЦИ
Облаци од Западна Европа нема да ни дојдат, а и од Источна Европа нема да ни дојдат, фактички нема да има туѓи облаци туку само наши бидејќи се што ќе се формира како водена маса ќе ни биде домородно и домашно. Тоа ќе биде уште една потврда дека нас Европа не ни треба и дека ние се си можеме, па дури и сами да си правиме облаци. Додуша за правење магла и фрлање песок во очи сме мајстори и рамни ни нема на континентов.

СО ТИКВИЧКА
А сега, една ексклузивна вест. Имено, ако сте јаделе таратур знаете како се подготвува: рендате краставица, ја ставате во кисело млеко, додавате зејтинче и солче, плус лукче за шмек, сето тоа го мешате и потоа се фрлате на кркање.
Од наши гастрономски извори што сакаат да останат анонимни, ни беше предложено наместо краставица да изрендаме тиквичка (онаа зелената). Тоа го направивме и можеме да ви кажеме дека тараурот со тиквичка е топ и морате да го пробате.

ЖРТВИ
Неколку стотини индиски свекрви формираа Сеиндиски форум за заштита на свекрви од нивните снаи. Во телевизиските драми не прикажуваат како крвопијки, но во реалноста сме жртви, тврди шефицата на побунетите свекрви, Нена Дулиа.
Тргна работава. Со оглед на тоа што свекрвинско- снајскиот анатагонизам е вонвременска битка, не ќе зачуди доколку во блиска иднина здруженијата од ваков тип прераснат во глобално светско движење...

ТОА Е!           
1. Додека маж и беше на работа, на комшивката С.С. од шести спрат и се затна вц шолјата. Таа го викна хаузмајсторот  Л.Љ инаку комшија од трети кат, кој наместо шолјата ја оправи комшивката. По пет месеци швалерисување СС и ЛЉ се разведоа од своите партнери и сега ќе се земат. Заклучок: ако ти се затне  шолјата чекај го маж ти да се врати од работа.